aap ko mujh se mohabbat bhī nahīñ
aur ''nahīñ'' kahne kī jur.at bhī nahīñ
jaate haiñ mahfil se merī jā.iye
roknā kuchh merī fitrat bhī nahīñ
munhasir jis pe ho merī zindagī
tū ne kī aisī mohabbat bhī nahīñ
bevafā kī ham-rahī se fā.eda?
aur ab chalne kī himmat bhī nahīñ
jo kabhī dīvār pe laTkā.ī thī
ab tire kamre kī zīnat bhī nahīñ
maiñ kisī ko chhoḌ duuñ tere liye
tujh se kuchh aisī to qurbat bhī nahīñ
'ḳhushtar' is mehñdī lage hāthoñ kī ab
jaane kyuuñ pahlī sī rañgat bhī nahīñ