dil meñ kyā thā jo kho gayā hai kahīñ
merā nuqsān ho gayā hai kahīñ
vo tirī khoj meñ rahā aur phir
ġhāliban tujh ko ro gayā hai kahīñ
rañg vo le gayā magar mujh meñ
apnī ḳhushbū samo gayā hai kahīñ
terī āvāz bhī nahīñ suntā
kyā mirā baḳht so gayā hai kahīñ
ham-rah-e-sad-malāl hai vo kabhī
aur har rañj dho gayā hai kahīñ
yuuñ tahī-dast-o-dil-girifta na thā
kuchh na kuchh mujh ko ho gayā hai kahīñ