ye mausam surma.ī hai aur maiñ huuñ

magar bas ḳhāmushī hai aur maiñ huuñ

na jaane kab vo badle ruḳh idhar ko

musalsal be-ruḳhī hai aur maiñ huuñ

taġhāful par taġhāful ho rahe haiñ

kisī kī dil-lagī hai aur maiñ huuñ

tasavvur hī sahārā ban gayā hai

ajab tanhā.ī sī hai aur maiñ huuñ

ye kaisī vaqt ne badlī hai karvaT

fareb-e-zindagī hai aur maiñ huuñ

laboñ pe naam chehra hai nazar meñ

baḌī nāzuk ghaḌī hai aur maiñ huuñ

udāsī 'indirā' itnī baḌhī hai

hamesha shā.irī hai aur maiñ huuñ