kahīñ giraft nahīñ koī isti.ārā nahīñ

navāñ falak huuñ ki jis par koī sitārā nahīñ

ruke muñDer pe kab tā.irān-e-rañg sadā

sabāt ho jise aisā koī nazārā nahīñ

ulajh rahā hai mirā baḳht phir mire dil se

hamārā kaise hai vo shaḳhs jo hamārā nahīñ

darā-e-sarhad-e-aql-o-ḳhirad agar hai ḳhalā

to ye na samjheñ ki is bahr kā kinārā nahīñ

ham ahl-e-dil the so ye hādisa to honā thā

ki ahd vo bhī sahā hai jise guzārā nahīñ