maiñ duur ho ke bhī us se kabhī judā na huā
ki us ke ba.ad kisī kā bhī āshnā na huā
tamām umr mirā mujh se iḳhtilāf rahā
gila na kar jo kabhī terā ham-navā na huā
vo jaate jaate dilāse bhī de gayā kyā kyā
ye aur baat ki phir us se rābta na huā
hazār shukr salāmat hai merā sar ab bhī
hazār dushman-e-jāñ se bhī dostāna huā
zarā sī choT pe jhankār guuñj uThtī hai
ki saaz TuuT gayā phir bhī be-sadā na huā
kuchh itnā sahl nahīñ thā zamīr kā saudā
balā se maiñ kabhī ahl-e-qabā huā na huā
ajab hai yādoñ kī bahtī huī ye ḳhushk nadī
lahū ko aañkh se Tapke hue zamāna huā