mujhe nahīñ hai koī vahm apne baare meñ
bharo na had se ziyāda havā ġhubāre meñ
tamāshā ḳhatm huā dhuup ke madārī kā
sunahrī saañp chhupe shaam ke piTāre meñ
jise maiñ dekh chukā us ko log kyuuñ dekheñ
na chhoḌī koī bhī baaqī kashish nazāre meñ
vo boltā thā magar lab nahīñ hilātā thā
ishāra kartā thā jumbish na thī ishāre meñ
tamām log gharoñ kī chhatoñ pe aa jaa.eñ
baḌī kashish hai na.e chāñd ke nazāre meñ
mile mujhe bhī agar koī shaam fursat kī
maiñ kyā huuñ kaun huuñ sochūñgā apne baare meñ
purānī samt muḌegā na koī bhī 'sājid'
ye ahd-e-nau na bahegā qadīm dhāre meñ