phuul murjhā jā.eñge kāñTe lage rah jā.eñge

har ḳhushī miT jā.egī bas dukh hare rah jā.eñge

lāla-zāroñ kohsāroñ meñ tumheñ DhūñDeñge ham

yaad ke be-nām se kuchh silsile rah jā.eñge

tum qarīb ho kar bhī itnī duur hote jaate ho

qurbatoñ ke darmiyāñ bas fāsle rah jā.eñge

tasfiya mābain apne ho na pā.egā kabhī

ham anā kī aag meñ jalte hue rah jā.eñge

azm kī sham.eñ umīdoñ kī har ik qindīl ko

ham bujhā kar zulmat-e-shab meñ khaḌe rah jā.eñge

surma-o-ġhāza ke badle dhuul jamtī jā.egī

sab ke chehre gard-e-qismat se aTe rah jā.eñge

sab chale jā.eñge ik be-nām manzil kī taraf

ghar kī taḳhtī kī jagah katbe lage rah jā.eñge