go dahr ke naqshe meñ haiñ bāhar bhī nahīñ ham

rakhte haiñ nishāñ aur ujāgar bhī nahīñ ham

kyuuñ ham se phir ummīd-e-sadaf bāñdh rahe ho

jab tum ko patā hai ki samundar bhī nahīñ ham

ḳhushbū kī tarah phuul ke pinjre meñ nahīñ band

āzād fazāoñ kā muqaddar bhī nahīñ ham

ehsās hai phir ḳhāna-badoshī kā hameñ kyuuñ

rahne ko Thikāna bhī hai be-ghar bhī nahīñ ham

kaise ho ḳhad-o-ḳhāl se pahchān hamārī

ma.anī kī tarah lafz ke andar bhī nahīñ ham

parvāz sabab kaise ho bachchoñ kī ḳhushī kā

titlī kī tarah mus.haf-e-gul par bhī nahīñ ham

is kā ye taqāzā hai ki ahkām bajā laa.eñ

jis husn kā sarkār ke naukar bhī nahīñ ham