āḳhirī baar zamāne ko dikhāyā gayā huuñ
aisā lagtā hai ki maiñ daar pe laayā gayā huuñ
sab mujhe DhūñDne nikle haiñ bujhā kar āñkheñ
baat niklī hai ki maiñ ḳhvāb meñ paayā gayā huuñ
peḌ bhī zard hue jaate haiñ mujh se mil kar
jaane maiñ kaisī udāsī se banāyā gayā huuñ
raah taktī hai kisī aur jagah ḳhush-ḳhabarī
maiñ magar aur hī raste se bulāyā gayā huuñ
kitnī mushkil se mujhe dhuup ne sarsabz kiyā
kitnī āsānī se bārish meñ jalāyā gayā huuñ