zahrāb rag-e-jāñ meñ utārā hī bahut thā
bastī ne tirī mujh ko rulāyā hī bahut thā
vīrān hue aah ke asarāt se maskan
logoñ ne mujhe mil ke satāyā hī bahut thā
honā thā kisī roz hameñ yuuñ bhī to paspā
palkoñ pe tujhe ham ne biThāyā hī bahut thā
ik roz to milnā thā jafā-kash ko sila bhī
paiġhām-e-vafā ham ne sunāyā hī bahut thā
girnā thā kisī roz bulandī se hameñ bhī
ḳhvāboñ kā nasha aañkh pe chhāyā hī bahut thā
'ḳhanda' ye jo maiñ detī bhī to qarz kahāñ thā
pahle se azīzoñ pe baqāyā hī bahut thā