ishq chhuptā nahīñ chhupāne se

fā.eda kyā nazar bachāne se

jab qafas meñ charāġh jalte haiñ

lau nikaltī hai āshiyāne se

tark-e-ummīd ik bahāna thā

kar chuke ye bhī sau bahāne se

hoshiyār ai nigāh-e-vaqt-navāz

ruḳh badalte hue zamāne se

hāsil-e-zikr ho tumhī lekin

ibtidā hai mire fasāne se

jāgnā thā hameñ ba-kār-e-hayāt

so.e haiñ maut ke bahāne se

zikr-e-mahbūb farz thā 'anjum'

kah liye sher is bahāne se