mutma.in baiThā huuñ ḳhud ko jaan kar
aur kyā miltā ḳhudā ko maan kar
mere dushman kī sharāfat dekhiye
daar kartā hai mujhe pahchān kar
zehn-o-dil tafrīq ke qaa.il nahīñ
kyā karūñ apnā parāyā jaan kar
dosto rūdād-e-manzil phir kabhī
rāsta chup thā mujhe pahchān kar
zindagī se ab bhī samjhautā nahīñ
jī liye terī zarūrat jaan kar
apne andar rāste milne lage
ruk gayā thā ḳhud ko manzil jaan kar
sher to 'anjum' atā-e-ġhaib hai
fā.eda kyā lafz-o-ma.anī chhān kar