baat kī baat se Dar lagtā hai
is musāvāt se Dar lagtā hai
tum koī baat samajhte hī nahīñ
bas isī baat se Dar lagtā hai
jis meñ koī na mile apne sivā
us mulāqāt se Dar lagtā hai
dil ba-zid hai ki vahī baat kaho
sab ko jis baat se Dar lagtā hai
raaz kī baat to koī bhī nahīñ
arz-e-hālāt se Dar lagtā hai
jin meñ garmī na ujāle na mahak
aise din-rāt se Dar lagtā hai
ḳhud ko parkhā to ye samjhe 'anjum'
kyuuñ kisī zaat se Dar lagtā hai