zinda huā hai aaj tū marne ke ba.ad bhī
aayā hai paas baaḌh utarne ke ba.ad bhī
kin pāniyoñ kī or mujhe pyaas le chalī
niile samundaroñ meñ utarne ke ba.ad bhī
nañgī haqīqatoñ se paḌā vāsta hameñ
shīshoñ se aks aks guzarne ke ba.ad bhī
kaalī rutoñ ke ḳhauf ne jiine nahīñ diyā
dariyā se mauj mauj ubharne ke ba.ad bhī
har lamha zindagī ko nayā ruup chāhiye
ik bojh ban ga.ī hai sañvarne ke ba.ad bhī
āñkhoñ meñ merī jāgtī rātoñ kā karb hai
har zaḳhm terī yaad kā bharne ke ba.ad bhī