aao ki koī ḳhvāb kareñ un ke havāle
dekhe hī nahīñ jin ne kabhī din meñ ujāle
pāgal sā huā jaatā hai ḳhāmosh samundar
paanī pe baras jaate haiñ jab chāñd ke haale
ham sā bhī gunahgār koī ho to batāo
patthar pe khilā.e haiñ bahut ḳhuun se laale
manzar koī hañstā huā āñkhoñ meñ chhupā luuñ
hai kaun jo ik pal ke liye maut ko Taale
phūloñ se Dhake rāste hamvār bahut haiñ
āzār musāfir haiñ magar paañv ke chhāle