manzar ye apnī aañkh meñ kaisā utar gayā
shīshe kī samt dekhā to shīsha bikhar gayā
ik ḳhvāb thā jo mujh se bayāñ ho nahīñ sakā
ik rañg thā jo dhuup se Takrā ke mar gayā
aisā huā ki niiñd bhī rasta bhaTak ga.ī
sūraj bhī jaltī aañkh meñ sab dhuup bhar gayā
kaisī ye raat hai ki havā bhī laraz uThī
kaisī ye raushnī ki sitāra bhī Dar gayā
pathrā ga.e haiñ phuul se ma.asūm log bhī
bastī pe apnī kaun sā mausam guzar gayā