dahr ke andhe kueñ meñ kas ke āvāza lagā

koī patthar pheñk kar paanī kā andāza lagā

zehn meñ sochoñ kā sūraj barf kī sūrat na rakh

kohr ke dīvār-o-dar par dhuup kā ġhāza lagā

raat bhī ab jā rahī hai apnī manzil kī taraf

kis kī dhun meñ jāgtā hai ghar kā darvāza lagā

kāñch ke bartan meñ jaise surḳh kāġhaz kā gulāb

vo mujhe itnā hī achchhā aur tar-o-tāza lagā

pyaar karne bhī na paayā thā ki rusvā.ī milī

jurm se pahle hī mujh ko sañg-e-ḳhamyāza lagā

shahr kī saḌkoñ par andhī raat ke pichhle-pahar

merā hī saaya mujhe rañgoñ kā shīrāza lagā

jaane rahtā hai kahāñ 'iqbāl-sājid' aaj kal

raat din dekhā hai us ke ghar kā darvāza lagā