un se māyūs-e-iltifāt nahīñ

go ba-zāhir tavaqquāt nahīñ

ishq hī vaj.h-e-mushkilāt nahīñ

yuuñ bhī ġham se kahīñ najāt nahīñ

ishq kī azmateñ bajā lekin

ishq hī maqsad-e-hayāt nahīñ

jin ko āsā.isheñ mayassar haiñ

vo bhī āsūda-e-hayāt nahīñ

ishq hai tāb-āzmā lekin

aap chāheñ to koī baat nahīñ

vo ḳhafā aur ik jahāñ dushman

ab koī sūrat-e-hayāt nahīñ

azm-e-takmīl-e-'ārzū' karte

zindagī ko magar sabāt nahīñ