naqd-e-dil-o-jāñ us kī ḳhātir rahn-e-jām karo

'mīr' ke bāda-e-ġham-ḳhurda ko mai-ḳhvāroñ meñ aam karo

qashqa khīñcho dair meñ baiTho pairvī-e-asnām karo

kesh-e-barahman ko apnāo jurm-e-vafā ko aam karo

ḳhvāh koī bohtān tarāsho yā aa.ed ilzām karo

tark-e-ta.alluq se pahle kuchh aur hameñ bad-nām karo

sāz-e-shikast-e-dil kī qīmat kaun chukāne aa.egā

gītoñ kī dūkān baḌhāo naġhmoñ ko nīlām karo

ek ḳhayāl-e-ḳhām hai maanā is kī tamannā is kā shauq

umr-e-ḳhizr mayassar ho to sirf ḳhayāl-e-ḳhām karo

nagrī nagrī phire musāfir bastī bastī chhānī ḳhaak

Tuk us zulf ke saa.e meñ bhī koī ghaḌī ārām karo

jin ke dam se ġhurbat meñ bhī bazm-e-tamannā raushan hai

pyaar un saarī māh-vashoñ ko 'ishqī' nām-ba-nām karo