bolegā kaun āshiq-e-nādār kī taraf

saarā zamāna aaj to hai yaar kī taraf

jin aañkh se liyā thā dil ab vo rahī na aañkh

hairat se dekhtā huuñ ruḳh-e-yār kī taraf

darbāñ kabhī jo roke vo nāzuk mizāj haiñ

muñh kar ke so.eñ ham na dar-e-yār kī taraf

haare hue ho bosoñ kā kar lo abhī hisāb

fāzil hai kuchh hamārā hī sarkār kī taraf

baiThā hai kab se muntazir yaañ par nigāh-e-mehr

dekh aañkh uThā ke tālib-e-dīdār kī taraf

paḌtī hai jabki abrū-e-qātil pe merī aañkh

rah rah ke dekhtā hai vo talvār kī taraf

dāġh-e-riyā sharāb se dhone ke vāste

zāhid chalā hai ḳhāna-e-ḳhummār kī taraf

bulbul ne kī bahār meñ kis yaas se ik aah

chāk-e-qafas se dekh ke gulzār kī taraf

paḌhtā huuñ fātiha maiñ sū-e-qabr-e-kohkan

hotā hai jab guzar kabhī kohsār kī taraf

yuuñ dil pe mere paḌtī hai aañkh us kī jis tarah

jallād dekhtā hai gunahgār kī taraf

kartā hai shauq-e-dil ke evaz mol husn kā

dallāl boltā hai ḳharīdār kī taraf

ā.īna saañ huuñ āmad-e-dilbar kā hairatī

ruḳh sū-e-dar hai pusht hai dīvār kī taraf

phūloñ meñ ye kahāñ ḳhalish-e-ḳhār kā mazā

jaanā junūñ na dasht se gulzār kī taraf

barbād kar na ḳhaak mirī ai havā-e-shauq

le chal uḌā ke kūcha-e-dil-dār kī taraf

kaun ab kare hamārī taraf-dārī ai 'qalaq'

dil tak hai apnā apne dil-āzār kī taraf