vaqt kī nākāmiyāñ haiñ aur kyā
fāsle ab darmiyāñ hai aur kyā
pūchhtā hāsil zamāna ishq kā
chāhatoñ meñ dūriyāñ haiñ aur kyā
kyuuñ sabhī meñ DhūñDte ho ḳhūbiyāñ
ḳhūbsūrat ḳhāmiyāñ haiñ aur kyā
sāmne dekhā na pīchhe ro diye
aisī bhī majbūriyāñ haiñ aur kyā
tishnagī-e-ishq ho be-intihā
jhuuT sab dushvāriyāñ haiñ aur kyā
jaan kar anjān sā ho baiThnā
is meñ hī āsāniyāñ haiñ aur kyā
ab to us ke bhī na apne hī rahe
umr-bhar ḳhāmoshiyāñ haiñ aur kyā