mausam-e-gul meñ koī kab hosh-mandāna chalā

phuul dekhe jis ne kāñToñ meñ vo dīvāna chalā

ek hī manzil pe har raahī ko jaanā thā magar

zo.am-e-bātil meñ chalā jo bhī judāgāna chalā

us ke har ik gaam par thī kāmrānī saath saath

kārgāh-e-dahr meñ jo sarfaroshāna chalā

vā.izān-e-kam-nazar haiñ dushman-e-tamkīn-e-hosh

miT gayā vo in kī bātoñ par jo dīvāna chalā

mai-kade meñ ranj-o-ġham kaisā kahāñ kī mushkileñ

har ḳhalish jaatī rahī jab daur-e-paimāna chalā

āfrīñ sad āfrīñ ye himmat zauq-e-talab

sham.a ke jalte hī jal marne ko parvāna chalā

koī asrār mashiyyat ho na paayā āshkār

be-ḳhabar aayā thā 'kashfī' aur begāna chalā