sadā kā loch suḳhan kā nikhār le ke chale

tirī nazar se fusūn-e-bahār le ke chale

tire jamāl kī sub.h-e-javāñ thī āñkhoñ meñ

jabīñ pe shām-e-sitam kā ġhubār le ke chale

rah-e-vafā meñ matā-e-safar kī baat na pūchh

bas ek zindagī-e-musta.ār le ke chale

na yaar lutf pe maa.il na shahr dard-shanās

kahāñ ye ham dil-e-ummīd-vār le ke chale

talab kī raah meñ ik ye bhī hādisa guzrā

ham apne zauq-e-nazar kā vaqār le ke chale