ye ajab rāsta hai jis pe lagāyā hai mujhe

mahv-e-hairat huuñ ki kyā chiiz banāyā hai mujhe

terī duurī bhī hai mushkil tirī qurbat bhī muhāl

kis qadar tū ne mirī jaan satāyā hai mujhe

tū kisī phuul kisī aañkh ke parde meñ rahā

tū ne kab apnā hasīñ chehra dikhāyā hai mujhe

mere firdaus kī nahreñ mirī ḳhātir haiñ to kyuuñ

pyaas ke dasht meñ hairān phirāyā hai mujhe

saarī maḳhlūq se taqvīm meñ ahsan huuñ maiñ

aur phir aag kā īñdhan bhī banāyā hai mujhe

apnī taḳhrīb pe nādim huuñ na ta.amīr pe ḳhush

tū ne Dhāyā hai mujhe tū ne banāyā hai mujhe