aadmī apnī zaat meñ tanhā
ālam-e-shash-jihāt meñ tanhā
ai ḳhudā tū hī be-misāl nahīñ
maiñ bhī huuñ kā.enāt meñ tanhā
mujh ko har ek baat kā ġham hai
maiñ huuñ har ek baat meñ tanhā
maut ke dasht-e-be-kanār meñ gum
shahr ke hādsāt meñ tanhā
mujh ko kis jurm meñ utaar diyā
kār-zār-e-hayāt meñ tanhā
be-amāñ dushmanoñ kī zad meñ huuñ
dahr ke somnāt meñ tanhā
āp-apnī talāsh hai mujh ko
huuñ ajab mushkilāt meñ tanhā