kuchh aur bhī ziyāda sañvar ke dikhā.ūñgā
ai zindagī tire liye mar ke dikhā.ūñgā
tuġhyāniyāñ to raḳht-e-safar haiñ mire liye
sāhil pe ek roz utar ke dikhā.ūñgā
kab tak sameT rakkhūñ sharār-e-junūñ ko maiñ
jañgal kī aag huuñ to bikhar ke dikhā.ūñgā
ḳhvāhish se kab ye haath falak tak pahuñchtā hai
jo kah rahā huuñ maiñ use kar ke dikhā.ūñgā
saarā safar faqat nahīñ saa.e ke vāste
shāḳh-o-gul-o-samar bhī shajar ke dikhā.ūñgā