terī mehñdī meñ mire ḳhuuñ kī mahak aa jaa.e
phir to ye shahr mirī jaan talak aa jaa.e
bus pe ye soch ke chaḌhte hue rah jaatā huuñ
kyā ḳhabar tere ravayye meñ lachak aa jaa.e
uuñT aur ret mirī zaat kā hissa the magar
ab qadam ghar se nikālūñ to saḌak aa jaa.e
ghar kī dīvār pe karvā ke safedī piilī
chāhtā huuñ mirī āñkhoñ meñ chamak aa jaa.e
ye bhī mumkin hai mirā saaya mirā saath na de
ye bhī mumkin hai mujhe terī kumak aa jaa.e