mirī hayāt agar muzhda-e-sahar bhī nahīñ

sitam ye hai ki tire ġham kī rahguzar bhī nahīñ

chaman meñ hoñ meñ pareshān misl-e-mauj-e-nasīm

chaTak ke ġhunche kaheñge hameñ ḳhabar bhī nahīñ

nishāt-o-kaif ke lamhoñ zarā Thahar jaao

bahār raah meñ hai duur kā safar bhī nahīñ

maiñ terī jumbish-e-mizhgāñ se kaañp jaatā hoñ

agarche dil ko ġham-e-do-jahāñ se Dar bhī nahīñ

fareb-e-va.ada pe ham tā-abad ji.eñ lekin

hazār haif ye imkān umr bhar bhī nahīñ

koī to hamdam-e-derīna de sadā is dam

vo ajnabī hoñ ki mānūs apnā ghar bhī nahīñ

nasīm sar-ba-garebāñ sabā hai sar-gardāñ

vo vaqt hai koī ḳhushbū kā rāhbar bhī nahīñ

zamīn par hī kahīñ nuur kā surāġh lagāo

sitāre Duub ga.e charḳh par qamar bhī nahīñ

kaTī hai āñkhoñ hī āñkhoñ meñ shām-e-hijr magar

shab-e-darāz-e-alam itnī muḳhtasar bhī nahīñ

kisī kī narm-nigāhī kī aañch hai varna

ye dil-pazīr navā jalva-e-hunar bhī nahīñ

havā-e-shām se kitne charāġh jal uTThe

dayār-e-dil meñ tamannā kā ik sharar bhī nahīñ

na jaane kyuuñ dar-e-zindāñ bhī kaañp uThtā hai

sadā-e-'fauq' agar aisī kārgar bhī nahīñ