ye merī duniyā ye merī hastī

naġhma-tarāzī sahbā-parastī

shā.ir kī duniyā shā.ir kī hastī

yā nāla-e-ġham yā shor-e-mastī

sab se gurezāñ sab par barastī

āñkhoñ kī mastī mahñgī na sastī

yā ḳhuld o saaqī ai jazb-e-mastī

yā TukḌe TukḌe dāmān-e-hastī

mahv-e-safar huuñ garm-e-safar huuñ

merī nazar meñ rif.at na pastī

in añkhḌiyoñ kā aalam na pūchho

sahbā hī sahbā mastī hī mastī

vo aa bhī jaate vo ho bhī jaate

chashm-e-tamannā phir bhī tarastī

un kā karam hai un kī mohabbat

kyā mere naġhme kyā merī hastī