vo parinde bhī saath laayā thā
maiñ ne jis peḌ ko bulāyā thā
terā hañsnā bhī kyā musībat hai
maiñ koī baat karne aayā thā
ye havā.eñ bhī kitnī jhūTī haiñ
ham ne bas haath hī milāyā thā
phir koī baat aa ga.ī dil meñ
maiñ use paas le hī aayā thā
vo to hairat meñ Dālnā thā use
kaun dariyā ko rok paayā thā
titliyāñ bhar ga.iiñ thiiñ kamre meñ
phuul dīvār par banāyā thā
vo mohabbat agar nahīñ thī 'hasan'
us ne chaa.e meñ kyā milāyā thā