chaap aa.e ki mulāqāt ho āvāze se
kab se tanhā.ī lagī baiThī hai darvāze se
mujh se tasvīr talab kartī haiñ merī āñkheñ
maiñ ne kuchh rañg chune the tire shīrāze se
sāf-goī se ab ā.īna bhī katrātā hai
ab to pahchāntā huuñ ḳhud ko bhī andāze se
maiñ to miTTī kā badan oḌh ke ḳhud niklā huuñ
kyā Darātī haiñ havā.eñ mujhe ḳhamiyāze se
apne chehre pe na auroñ ke ḳhad-o-ḳhāl sajā
ruup aatā hai kahīñ utre hue ġhāze se
jhūTī azmat kī pujārī hai 'muzaffar' duniyā
pasta-qad log bhī guzreñ baḌe darvāze se