nikhar sakā na badan chāñdnī meñ sone se

sahar huī to ḳharāsheñ chunīñ bichhaune se

sadaf liye hue ubhrī hai laash bhī merī

bachā rahe the mujhe log ġharq hone se

hunar hai tujh meñ to qaa.il bhī kar zamāne ko

chamak uThegī na shakl aa.ine ko dhone se

lipaT rahī haiñ mire rāstoñ se raushaniyāñ

nazar meñ log haiñ kuchh sāñvle salone se

lagā ke zaḳhm bahāne chalā hai ab aañsū

rukā hai ḳhuun kahīñ paTTiyāñ bhigone se

hamīñ na hoñ kahīñ dekho to ġhaur se logo

haiñ tifl-e-vaqt ke hāthoñ meñ kuchh khilaune se

mire dukhoñ se bhī kuchh fā.eda uThā duniyā

zamīñ kī pyaas bujhe bādaloñ ke rone se

lahū ragoñ meñ 'muzaffar' chhuḌā.e mahtābī

mile hai kyā use chiñgāriyāñ chubhone se