maiñ hare mausamoñ meñ jaltā rahā

ḳhushbuoñ se dhuāñ nikaltā rahā

aag par hoñT rakh diye the kabhī

āḳhirī saañs tak pighaltā rahā

maiñ akelā bhī kārvāñ kī tarah

rāstoñ ke baġhair chaltā rahā

hādse mujh ko pesh aate rahe

aur zamāne kā jī bahaltā rahā

merī āvāz munharif na huī

vaqt kā faisla badaltā rahā

zindagī mujh ko qatl kartī rahī

maut kī vādiyoñ meñ paltā rahā

kārobār-e-suḳhan kiyā maiñ ne

yā 'muzaffar' lahū ugaltā rahā