raat ga.e yuuñ dil ko jaane sard havā.eñ aatī haiñ
ik darvesh kī qabr pe jaise raqqāsā.eñ aatī haiñ
sāda-lauhī kī nibTegī is rañgīn zamāne se
do āñkhoñ kā pīchhā karne laakh adā.eñ aatī haiñ
DhūñDh rahī hai mere tan meñ shāyad merī ruuh mujhe
apne sannāToñ se kuchh mānūs sadā.eñ aatī haiñ
merā ik ik lamha karb liye phirtā hai sadiyoñ kā
ik duniyā ke raste meñ kitnī duniyā.eñ aatī haiñ
pahle sar se ūñchī lahroñ se bhī ham laḌ lete the
ab to in sūkhe hoñToñ par sirf duā.eñ aatī haiñ
dasht-navardī ke daurān 'muzaffar' sar par dhuup rahī
jab se kashtī meñ baiThe haiñ roz ghaTā.eñ aatī haiñ