terī jhalak nigāh ke har zāviye meñ hai

dekhūñ to shakl apnī mire aa.ine meñ hai

laTkī huī hai ruuh kī suulī pe zindagī

sāñsoñ kā silsila hai ki rassī gale meñ hai

kāñToñ kī pyaas ne mujhe khīñchā barahna-pā

jaise bharī sabīl har ik aable meñ hai

sāñsoñ kī oT le ke chalā huuñ charāġh-e-dil

siine meñ jo nahīñ vo ghuTan rāste meñ hai

merī sadā ke phuul chaḌhāte haiñ mujh pe log

zinda to huuñ magar mirā fan maqbare meñ hai

Dāloñ kahāñ paḌāv ki raste bhī haiñ ravāñ

manzil kahāñ mile ki vo ḳhud qāfile meñ hai

maiñ tujh ko chāhtā huuñ go hāsil na kar sakūñ

lazzat vo qurb meñ kahāñ jo fāsle meñ hai

paayā sila ye tujh ko 'muzaffar' ne DhūñDh kar

shāmil ab us kā naam bhī tere pate meñ hai