Dubone vāloñ ko sharminda kar chukā hūñgā

maiñ Duub kar hī sahī paar utar chukā hūñgā

pahuñch to jā.ūñgā āb-e-hayāt tak lekin

zabāñ bhigone se pahle hī mar chukā hūñgā

sunā.ī jā.egī jab tak mujhe sazā-e-suḳhan

sukūt-e-vaqt meñ āvāz bhar chukā hūñgā

misāl-e-reg huuñ meñ sā.atoñ kī muTThī meñ

vo jab tak aa.egā saarā bikhar chukā hūñgā

zamāna aa.egā us vaqt ḳhair-maqdam ko

jab is jahāñ se 'muzaffar' guzar chukā hūñgā