jab dard mohabbat kā mire paas nahīñ thā
maiñ kaun huuñ kyā huuñ mujhe ehsās nahīñ thā
TuuTā mirā har ḳhvāb huā jab se judā vo
itnā to kabhī dil mirā be-ās nahīñ thā
aayā jo mire paas mire hoñT bhigone
vo ret kā dariyā thā mirī pyaas nahīñ thā
baiThā huuñ maiñ tanhā.ī ko siine se lagā ke
is haal meñ jiinā to mujhe raas nahīñ thā
kab jaan sakā dard mirā dekhne vaalā
chehra mire hālāt kā akkās nahīñ thā
kyuuñ zahr banā us kā tabassum mere haq meñ
ai 'naqsh' vo ik dost thā almās nahīñ thā