jab qāfila yādoñ kā guzrā to fazā mahkī
mahsūs huā tere qadmoñ kī sadā mahkī
ḳhvāboñ meñ liye ham ne bose tire bāloñ ke
jab hijr kī rātoñ meñ sāvan kī ghaTā mahkī
māñgī jo duā ham ne us shoḳh se milne kī
lobān kī ḳhushbū se baḌh kar vo duā mahkī
ik narm se jhoñke kī nāzuk sī sharārat se
kyā kyā na huī rusvā Daalī jo zarā mahkī
dīvāna huuñ āshiq huuñ āvāra huuñ mai-kash huuñ
ilzām ka.ī aa.e jab laġhzish-e-pā mahkī