vaise tū mere makāñ tak tū chalā aatā hai
phir achānak se tire zehn meñ kyā aatā hai
aaheñ bhartā huuñ ki pūchhe koī aahoñ kā sabab
phir tirā zikr nikaltā hai maza aatā hai
tere ḳhat aaj latīfoñ kī tarah lagte haiñ
ḳhuub hañstā huuñ jahāñ lafz-e-vafā aatā hai
jāte-jāte ye kahā us ne chalo aatā huuñ
ab yahī dekhnā hai jaatā hai yā aatā hai
tujh ko vaise to zamāne ke hunar aate haiñ
pyaar aatā hai kabhī tujh ko batā aatā hai