hijr kī shab hai aur ujālā hai

kyā tasavvur bhī luTne vaalā hai

ġham to hai ain-e-zindagī lekin

ġham-gusāroñ ne maar Daalā hai

ishq majbūr o nā-murād sahī

phir bhī zālim kā bol-bālā hai

dekh kar barq kī pareshānī

āshiyāñ ḳhud hī phūñk Daalā hai

kitne ashkoñ ko kitnī aahoñ ko

ik tabassum meñ us ne Dhālā hai

terī bātoñ ko maiñ ne ai vaa.iz

ehtirāman hañsī meñ Taalā hai

maut aa.e to din phireñ shāyad

zindagī ne to maar Daalā hai

sher naġhma shaguftagī mastī

ġham kā jo ruup hai nirālā hai

laġhzisheñ muskurā.ī haiñ kyā kyā

hosh ne jab mujhe sambhālā hai

dam añdhere meñ ghuT rahā hai 'ḳhumār'

aur chāroñ taraf ujālā hai