kyā huā husn hai ham-safar yā nahīñ

ishq manzil hī manzil hai rasta nahīñ

do parinde uḌe aañkh nam ho ga.ī

aaj samjhā ki maiñ tujh ko bhūlā nahīñ

tark-e-mai ko abhī din hī kitne hue

kuchh kahā mai ko zāhid to achchhā nahīñ

har nazar merī ban jaatī zanjīr-e-pā

us ne jaate hue muḌ ke dekhā nahīñ

chhoḌ bhī de mirā saath ai zindagī

mujh ko tujh se nadāmat hai shikva nahīñ

tū ne tauba to kar lī magar ai 'ḳhumār'

tujh ko rahmat pe shāyad bharosa nahīñ