akele haiñ vo aur jhuñjhlā rahe haiñ
mirī yaad se jañg farmā rahe haiñ
ye kaisī havā-e-taraqqī chalī hai
diye to diye dil bujhe jā rahe haiñ
ilāhī mire dost hoñ ḳhairiyat se
ye kyuuñ ghar meñ patthar nahīñ aa rahe haiñ
bahisht-e-tasavvur ke jalve haiñ maiñ huuñ
judā.ī salāmat maze aa rahe haiñ
qayāmat ke aane meñ rindoñ ko shak thā
jo dekhā to vaa.iz chale aa rahe haiñ
bahāroñ meñ bhī mai se parhez tauba
'ḳhumār' aap kāfir hue jā rahe haiñ