aur kyā umr kī kahānī hai

rā.egānī hī rā.egānī hai

ek ḳhāke meñ rañg bharnā hai

ik kahānī magar chhupānī hai

mujh ko taqlīd se bhī bachnā hai

sham.a se sham.a bhī jalānī hai

shahr meñ oḌhnī bhī hai tahzīb

dasht meñ ḳhaak bhī uḌānī hai

husn qaa.em zamīñ kā rakhte hue

ek bastī na.ī basānī hai

ek būḌhā ye kahtā phirtā hai

tāzgī aaj bhī purānī hai

ishq qaa.il nahīñ huā hai 'valī'

maslahat rāh-e-darmiyānī hai