Rafia Shabnam Abidi

roz uThta hai dhuan koh-e-nida ke us par

Rafia Shabnam Abidi

roz uThtā hai dhuāñ koh-e-nidā ke us paar

chāñd chup-chāp sulagtā hai fazā ke us paar

bhiig jaatī hai ye ma.asūm dhartī har sub.h

kaun rotā hai batāo to ghaTā ke us paar

sarhad-e-jism se aage had-e-imkāñ se pare

shahr-e-jāñ rahtā hai dīvār-e-anā ke us paar

nekiyāñ bāñTte rahne sazā lāzim hai

paara paara hai badan kū-e-jazā ke us paar

maiñ ki mañjdhār meñ huuñ kaun nikāle 'shabnam'

chhup gayā vo to kahīñ mujh ko bulā ke us paar

Top Urdushayar.com