basar ho yuuñ ki har ik dard hādisa na lage
guzar bhī jaa.e koī ġham to vāqi.a na lage
kabhī na phuul se chehre pe gard-e-yās jame
ḳhudā kare ki use ishq kī havā na lage
nazar na aa.e mujhe husn ke sivā kuchh bhī
vo bevafā bhī agar hai to bevafā na lage
yahī duā hai vo jab ho jamāl se āgāh
libās-e-nāz bhī pahne to dūsrā na lage
vo mehrbāñ sā lage us kī kuchh karo tadbīr
ḳhafā bhī ho to mirī aañkh ko ḳhafā na lage
mile jo nūr-talab dil bhī yuuñ munavvar ho
mirā harīf bhī shām-o-sahar burā na lage
kahāñ se lā.ūñ 'hasan' guftugū meñ vo andāz
mirā kalām kisī ko bhī be-mazā na lage