dil meñ utroge to ik jū-e-vafā pāoge

mauj-dar-mauj samundar kā patā pāoge

maiñ to kho jā.ūñgā tanhā.ī-e-jañgal meñ kahīñ

tum bhare ghar meñ kahāñ mujh ko bhalā pāoge

dil se be-sāḳhta umDe haiñ baḌhāo kaf-e-dast

aaj aañsū ko bhī ham-rañg-e-hinā pāoge

aag hī aag sahī ḳhvāb meñ jal kar dekho

is jahannum meñ bhī jannat kī havā pāoge

ġham uThāne kā ye andāz batātā hai 'na.īm'

ik na ik roz vafāoñ kā sila pāoge