hamāre paañv Darte haiñ tumhāre saath chalne meñ
zarā sā vaqt lagtā hai kabhī niyyat badalne meñ
tumheñ shāyad patā ho yā na ho shāyad patā tum ko
ki sāloñ-sāl lagte haiñ chubhā kāñTā nikalne meñ
kisī patthar kī mūrat se na karnā pyaar tum hargiz
hazāroñ saal lagte haiñ butoñ kā dil pighalne meñ
zarā sā vaqt to de zindagī mujh ko sambhalne kā
burā ho vaqt to kuchh vaqt lagtā hai sambhalne meñ
na jaane kyuuñ bujhī āñkhoñ meñ jugnūñ se chamakte haiñ
abhī to vaqt baaqī hai añdherī raat Dhalne meñ