niiñd kī golī na khaao niiñd laane ke liye
kaun aa.egā bhalā tum ko jagāne ke liye
beTā beTī phone par akasr batāte haiñ mujhe
vaqt miltā hī nahīñ hai gaañv aane ke liye
qabr apnī khod kar ḳhud leT jaao ek din
vaqt kis ke paas hai miTTī uThāne ke liye
vo bhī apne vo bhī apne vo bhī apne the kabhī
vo jo apne the kabhī vo the rulāne ke liye
ab jo apne haiñ na un kā haal ham se pūchhiye
haal bhī vo pūchhte haiñ to satāne ke liye
kis liye dhaḌkan baḌhī hai phir tirī majrūh dil
kyā abhī koī bachā hai āzmāne ke liye