balā kī pyaas thī hadd-e-nazar meñ paanī thā
ki aaj ḳhvāb meñ sahrā thā ghar meñ paanī thā
phir is ke ba.ad mirī raat be-misāl huī
udhar vo sho.ala-badan thā idhar meñ paanī thā
na jaane ḳhaak ke mizhgāñ pe ābshār thā kyā
mirā qusūr thā mere sharar meñ paanī thā
tamām umr ye uqda na vā huā mujh par
ki haath meñ thā yā chashm-e-ḳhizar meñ paanī thā
ajiib dasht-e-tamannā se thā guzar 'ḳhālid'
badan meñ reg-e-ravāñ thī safar meñ paanī thā