dar-o-dīvār bhī dete haiñ havāla merā
kaise mumkin huā is shahr meñ charchā merā
tum agar jaan ga.e ho to laboñ ko sī lo
yahī ḳhāmosh-mohabbat hai asāsa merā
ḳhauf aatā hai tujhe dasht kī vīrānī se
ai sabā tū ne abhī ghar nahīñ dekhā merā
din nikalte hī chalā aa.egā vo paas mire
raat se milne gayā hai abhī saaya merā
koī tāqat hai kahīñ jo nahīñ hone detī
TūTtā rahtā hai har roz irāda merā